OIN-SA LE BÍBLIA | Lisaun - 7

Wainhira ita besik no hadomi Bíblia diak liu,

tentasaun mos hahú boot, tanba demóniu la gosta sa mak ita boot halo.

            Wain-hira ita le'e hela Bíblia, ita presiza iha koñesimentu uitoan ka barak kona-ba istória mundiál, atu ita la ses hosi Bíblia
nia konteistu no perspetivu. Irak tempu agora, uluk   hanaran Babilónia no Asíria, reinu ne’ebé uluk forte tebetebes. Nune’e mos, Iran modernu agora, uluk hanaran reinu Pérsia. Ema Gregu no Romanu mai ikus, tanba ne’e la temi to’o tama ona ba Testamentu Da’rua (Novo Testamento) nia rohan. Alein ne’e, povu Ejiptu eziste tiha  ona dezde 3400 AC, maizumenus sékulu sanolu-resin ne'en antes Abraun nia tempu.

            Nasaun ka rai sira ne’ebé temi iha Bíblia laran la’os nu'udar notas istória mamuk. Iha tempu modernu, akontesimentu mundiál sira hanesan: funu, akordu entre nasaun sira, inisiativa kona-ba dame, terorista, ekonomia, polítika no fé infiltra ba rejiaun reinu antigu sira hanesan: Israel, Babilónia, Asíria, Pérsia, Mezopotámia (rai sira entre motan Tigre no Eufrates, iha nasaun Irak modernu) no sllt. iha ona tropas ezérzitu (militar) ne’ebé forte tebetebes, tanba ne’e sira konsege domina rejiaun ne’ebé luan ho ninia abitantes sira hotu. Komunidadi globál, komérsiu internasionál no diplomasia liga entidadi rua ne’ebé hanaran Leste no Weste ka Mundu Tuan no Mundu Foun. Judaízmu, Kristianizmu no Islamizmu, sei hanesan nafatin fator ativu ne’ebé iha influénsia boot ba moris oras ne’e no iha futuru hosi jerasaun Abraun, tantu Izak, Izmail no Nai Jezus.

            Wain-hira le'e Bíblia ajuda ita atu respeitu rejiaun sira iha era modernu ne’e ho ninia problema ne’ebé komplikadu, no hatene buat sabraut, rungugranga (chaos) hotu iha era ida ne’e sei ajuda ita atu kumpriende sa mak akontese iha tempu pasadu ho ninia sivilizasaun tomak.

            Wain-hira hatene ona buat realidadi sira ne’e espera katak ita animadu liu tan atu le'e Bíblia ne’ebé hafurak ho buat lalehan no tradisaun santa. Ema balu fó hanoin katak maneira úniku atu le'e Bíblia mak ne’e hahú hosi pájina oin to’o pájina kotuk, hahú hosi Livru Jénezis to’o Livru Revelasaun. Los ida ne’e mak Bíblia ninia estrutura, hanesan mos ho livru sira seluk. Tanba ne’e la sala mos se hakarak konsistente le'e Bíblia ho aprosimasaun diak ne’ebé temi iha leten. Maibé, karik halo nune’e, dala ruma bele le'e dala ida deit durante moris tomak, hafoin ne’e la le'e tan no la kumpriende buat ida. Keta haluha katak, le'e Bíblia la hanesan ho le'e livru novela ida.

            Maneira atu le'e hosi pájina da’uluk to’o pájina ikus, la’os sala, maibé karik todan ba sira ne’ebé foin hahú le'e Bíblia. Iha Igreja Katólika prepara ona kalendáriu
ba tinan ida no komunidadi balu halo hanesan leksionáriu, livru ki'ik ne’ebé sita teistu bibliku hodi uza iha liturjia lorloron nian. Maneira rua ne’e ajuda ita atu le'e Bíblia no halo reflesaun pesoál tuir leitura semanál ka diáriu nian. Ho maneira ne’e, ita bele le'e Bíblia tomak iha tinan rua ka tolu nia laran.

            Bíblia nu'udar fatin no instrumentu atu hasoru malu pesoál ho Maromak. Tanba ne’e presiza trata Bíblia nu'udar livru orasaun nian. Signifika ita uza Bíblia hodi ko’alia ho Maromak wainhira ita halo ita nia orasaun mesak, iha família no grupu. Karik ita le'e hetan liafuan ka fraze ruma ne’ebé ita la kumpriende lalika laran susar, tanba sira ne’ebé hakerek Bíblia, divulga Maromak Nia pensamentu no Ninia obra rasik. Ne’e duni, wain-hira ita la kumpriende husu ba Nia, Nai Ispíritu Santu, atu haroman ita, hanesan uluk Nia halo ba hakerek nain sira. No ita mos labele dúvida atu husu tulun ba ema seluk no padre sira ne’ebé besik iha ita nia hela fatin ka parókia. Ikus, wain-hira ita pesoál ka família ne’ebé hamaluk-an no hadomi Bíblia diak liu, tentasaun mos hahú boot, tanba demóniu la gosta sa mak ita boot halo. Maibé, se mak firme ho Nai Jezus, demóniu sei halai do'ok hosi nia. Paz e Bem!