NOVENA AVE MARIA TOLU

Hakneak, hahú loke Novena ne’e ho: Kredo no Ami Aman ida

(Hato’o ita nia pedidu............)

Nain feto Maria, Virjen kbi’it-nain, ba ita buat hotu bele deit. Tanba kbi’it ne’ebé Nai Maromak Kbi’it-Nain haraik ba ita. Ho laran no fiar metin, hau husu ita nia tulun iha susar ida ne’e, Inan keta hosik hau mesak. Tanba hau fiar tebtebes katak, Inan sei tulun duni hau. Maski iha susar laran ne’ebé difísil, ne’ebé la iha ona esperansa, ita nafatin sai hau nia mediadora ba ita nia Oan Mane, Jezus Kristu.

Tanba Maromak nia Majestade, hau nia hakru’uk ba ita no mós ba hau nia klamar nia salvasaun sei aumenta wain-hira Inan Santa simu hotu hau nia pedidu ne’e. Tanba nia, wain-hira hau nia pedidu ne’e sai lolos duni tuir ita nia Oan Mane nia hakaran, ho laran hau husu, oh Inan Santa Maria, hato’o hela ba, hau nia pedidu hirak ne’e hotu ba ita nia Oan Mane, Kristu Jezus, ne’ebé sei la dudu ses ita hosi Nia Futar-Oin.

Hau nia esperansa boot tebetebes ba ita. Tanba kbi’it ne’ebé la iha rohan ne’ebé Aman Maromak haraik ba ita. No hakru’uk ba kbi’it ne’ebé ita iha, hau hamulak hamutuk ho Santa Matilda ne’ebé ita fo hatene ba nia kona-ba reza “Ave Maria Tolu, ne’ebé kbi’it wain tebes.

Ave Maria............ Ave Maria............ Ave Maria............

(Hato’o ita nia pedidu............)

Virjen Santa ne’ebé hanaran Tronu Matenek–Nain, Tanba Maromak Nia Lia-fuan hela ho ita, Nia haraik Matenek Lalehan nian ne’ebé la iha rohan tanba ita nia Oan Mane, nudar personalidadi ne’ebé kmo’ok liu atu bele simu ne’e.

Ita hatene susar ne’ebé hau hasoru ne’e boot tebetebes. Tanba ne’e hau nia esperansa ba ita nia tulun mós boot wain. Nakonu ho fiar ba ita nia laran sadia, hau saran hau-an tomak ba ita boot, atu ita deit mak bele tinu buat hotu-hotu ho kbi’it no kdi’ak. Tanba Nai Nia Majestade no hau nia salvasaun. Hau fiar katak Nain Feto bele tulun hau ho maneira hotu-hotu ne’ebé posível atu hau nia pedidu ne’e Nai bele simu.

Oh Maria, Inan be Nai nia Sabedoria, Simu netik ami nia pedidu ne’ebé urjenti ne’e. Hau husu ne’e tanba ita nia laran kdi’ak ne’ebé sura labele, ne’ebé ita Oan Mane haraik ba ita liu hosi Nai Lia-tun ba ita.

Hamutuk ho Santu António hosi Lisboa no Saun Leonardo hosi Porto Mauricio, ne’ebé ho badinas haklaken kona-ba devosaun “Ave Maria Tolu” hau hamulak hodi hanai ita nia kd’iak tomak ne’ebé la iha rohan.

Ave Maria............ Ave Maria............ Ave Maria............

(Hato’o ita nia pedidu............)

Oh Inan ne’ebé laran kmanek no kmaus, Inan Miserikórdia ne’ebé Kmo’ok Liu, ne’ebé ohin loron ema wain hanaran “Inan ne’ebé nakonu ho Fuan-Domin”, Hau hakbesik ba ita futar oin, husu ho laran tebetebes, atu Inan Doben hatudu ita nia Fuan-Domin ba atan-oan hau. Wain-hira hau nia susar hetok boot, ita nia domin ba hau hetok boot liu tan.

Hau hatene, katak hau la soi hetan eh simu grasa ne’e. Tanba dala barak hau halo ita triste tebetebes ho hahalok sira ne’ebé hewai ita nia Oan Mane Santu. Maski hau nia sala boot tebetebes, maibé hau arepende tebetebes tanba hakanek ona Jezus no Ita Nia Futar-Fuan Santu.

Inan Maria, ita introduz-an ba Santa Brígida nu’udar “Inan ba salan-nain sira ne’ebé konverte”. Tanba ne’e perdua hau salan hotu nu’udar hau nia kuran agredese ba ita. Hanoin ba ita nia Oan Mane Nia Majestade deit no Nia Miserikórdia ho ita nia laran kdi’ak ne’ebé nabilan hodi simu atan hau nia pedidu ne’e liu hosi ita Oan Mane Nia mediasaun.

Oh Inan Maria, Virjen ne’ebé nakonu ho kdi’ak , laran kmaus no midar, la iha ema ida mak hasoru ita no husu ita nia tulun ita hosik sira fila liman mamuk. Tanba ita nia miserikórdia no kdi’ak, hau laran metin tebetebes, atu haraik mai hau Ispíritu Santu. No tanba ita nia miserikórdia ne’e, hamutuk Santu Afonso Ligouri, apóstulu eh sasin ba ita nia miserikórdia no manorin devosaun “Ave Maria Tolu”, hau hamulak atu hanai ita nia miserikórdia no ita nia kdi’ak tomak.

Ave Maria............ Ave Maria............ Ave Maria............

Iha finál dehan:

Nain Feto Maria, Inan ne’ebé diak no laran-luak, hado’ok tiha hau hosi sala eh pekadu boot hotu.

NOTAS:

1. Wain-hira nia pedidu kona-ba problema boot no importanti, diak liu halo novena dala tolu tutuir malu.

2. Atu ita nia novena ne’e bele hetan rezultadu lalais, diak se wain-hira ita promete buat sira tuir mai ne’e ba Nain Feto:

a. Kada dader no lorkraik fiel nafatin hodi reza: “Ave Maria”

b. Anunsiu eh fó sai ba ema seluk, katak ita nia novena ne’e Maromak simu ona. Asaun ne’e nu’udar ita nia agradesimentu ba Inan Virjen Maria ne’ebé Santa no kmo’ok tebetebes.