NOVENA LORON 9 BA SAUN FRANSISKU HOSI ASSIS

                                     HUSU SAUN FRANSISKU HUSI ASSIS NIA TULUN

*(Hahu novena ne’e ho halo konfisaun pesoál uluk ba nai-lulik ne'ebé besik ita nia parókia)

            Saun Fransisku ne'ebé ami hadomi, uluk ita moris a'at hanesan bandidu no goza ita nia moris tun-sa'e. Maibé, ita bo'ot bele konverte, hahú moris foun ho haraik-an, simples no moris ki'ak tanba Jezus Kristu. Ita nia domin ba Jezus Krusifikadu nebé kle'an no lakan makás, halo Jezus ne’e fó Nia Kanek Lima ba ita nu'udar sinál ita bo'ot nia unifikasaun ho Kristu. 

            Iha sékulu ida hanesan oras ne’e, ema fó valor liu ba moris edonista, egoista, individualista no materialista, ne’e mak halo ami presiza tebetebes ita bo'ot nia sigredu ne'ebé dada ema feto no mane wain hodi moris tuir ita bo'ot nia izemplu. Tanba ne’e, hanorin ami atu halo tuir ita bo'ot nia domin ne'ebé bo'ot tebetebes ba ema ki'ak sira no harohan mai ami atu ami fiel ba Jezus Krusifikadu ne'ebé  ita boot tuir to'o mate. Amin

ORASAUN DAME NIAN

NAI, halo hau nu'udar ema maklori dame…

Wain-hira mosu ódiu, halo hau maklori domin.

Wain-hira mosu tolok no tarata a'at, halo hau maklori perdaun.

Wain-hira mosu hafahe malu, halo hau maklori armonía.

Wain-hira mosu sala-dalan, halo hau maklori lia-lós.

Wain-hira mosu laran-rua, halo hau maklori serteza.

Wain-hira mosu dezanima, halo hau maklori esperansa.

Wain-hira mosu hahalok-nakukun, halo hau maklori naroman.

Wain-hira mosu tristeza, halo hau maklori laran-haksolok.

Oh Nai Maromak,

Hanorin hau atu gosta liu fó ksolok duke hein simu ksolok; hanorin hau atu kompriende ema seluk, duke hein atu ema kompriende hau; hanorin hau atu hadomi ema seluk, duke hau husu atu ema hadomi hau; tanba wain-hira ita fó mak ita sei simu;

wain-hira ita fó perdua, mak ema sei perdua ita.

Wain-hira mate santu, mak ita sei tama ba moris rohan laek.

Amin

LORON 1^O:

            Oh Nai Maromak, mai tulun hau ata.  
         

Harohan:

            Aman Lalehan, Ita Bo'ot hatene buat hotu-hotu no la iha buat ida mak subar husi Ita Bo'ot. Iha Ita Bo'ot Nia Laran Luak no  Ita Nia di'ak tomak, liu husi Saun Fransisku Assis, hau husu Nai, mai tulun hau iha hau nia susar no terus agora ne’e no simu hau nia pedidu ne'ebé hau hato'o ba ne’e ho laran haraik-an no fiar metin *(hatete sai ita bo'ot nia pedidu…). Amin.

*Ami Aman..1x. Ave Maria..3x. Gloria…1x.

Peniténsia ne'ebé ita boot tenki halo iha loron ne’e: Hatudu ita nia laran haraik-an hodi halo buat di'ak ida ba ema seluk iha loron ida ne’e.

LORON 2^O:

            Rona hau ata ba oh Nai Maromak, no hatudu Ita laran-sadia ba hau ata.

Harohan:

            Aman Lalehan, Ita Bo'ot Nia domin mai ami la pára no la iha rohan maski ami monu ba sala no la'o sala dalan. Oh Nai Maromak, Santísima Trindadi, ne'ebé Saun Fransisku Assis hahi no adora, hatudu Ita Laran-Luak mai hau ata, iha hau nia terus no susar agora ne’e *(hatete sai ita bo'ot nia pedidu…). Ho Saun Fransisku Assis nia tulun tanba Jezus Kristu, Ami Maksoin, sadia hau ata ema maksalak ne’e. Amin

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Buka hatene Jezus Nia sofrimentu iha ema ida ne'ebé besik ita.

LORON 3^o:

            Oh Nai Maromak, keta hadook-an husi hau ata.

Harohan:

            Aman Maromak domin rohan laek, Ita Bo'ot la do'ok husi ami ida-ida. Tanba Ita Bo'ot mak ami nia moris, fatin ami bok-an no ami nia hela fatin. Nai, habo'ot hau ata nia konsiénsia hodi hatene no senti Ita Bo'ot Nia prezensa no liu husi Saun Fransisku Assis ninia intersesaun hamatan ba hau ata nia nesesidadi ne'ebé urjenti ne’e *(hatete sai ita bo'ot nia pedidu…). Amin.

 *Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Fó ita nia atensaun tomak ba Maromak.

LORON 4^O:

            Hatudu Ita Bo'ot Nia dalan no hakarak sira ba hau ata, Oh Nai Maromak.

Harohan:

            Aman Maromak Kbi'it Nain, Ita Bo'ot Nia dalan no hakarak sira dala barak subar husi ami. Haraik Ita Bo'ot Nia naroman mai hau ata no liu husi Saun Fransisku Assis nia intersesaun, hau husu ba Ita Bo'ot iha hau nia susar laran ida ne’e, no ho Ita Bo'ot Nia kbi'it, fó lisensa atu hau ata hatene Ita Bo'ot Nia hakarak ne'ebé relasiona ho hau ata nia nesesidadi espesial ne’e *(hatete sai ita bo'ot nia pedidu…). Amin. 

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Hanoin didiak iha loron ne’e oin sa ita bele halo tuir Maromak Nia hakarak.

LORON 5^o:

            Oh Nai Maromak, haraik salvasaun ba sira ne'ebé presiza tebetebes salvasaun.

Harohan:

            Iha ita Bo'ot, oh Aman Lalehan, ho laran metin hau tau hau nia fiar tomak. Iha Ita Bo'ot Nia liman Kbi'it wain ne'ebé hamahan hau, hau husik hotu dúvidas no fiar ne'ebé la metin. Hau hein husi Ita Bo'ot no husi Saun Fransisku Assis nia intersesaun hakma'an hau husi hau nia terus sira agora ne’e *(hatete sai ita bo'ot nia pedidu…). Amin. 

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Tanba Maromak deit, fó ajuda ba ema ida ne'ebé karik ita la gosta.

LORON 6^O:

                        Oh Nai Maromak, keta hirus no fó kastigu hau ata.

Harohan:

            Aman Maromak Sadia Nain, Ita Bo'ot hatene hau nia frakeza no infidelidadi. Maski nune’e, Ita Bo'ot prontu atu perdua nafatin, no laran sadia ba hau iha hau nia problema sira ne’e. Iha Jezus Kristu Nia naran no liu husi Saun Fransisku Assis nia intersesaun, hit-An mai lalais tulun hau ata *(hatete sai ita bo'ot nia pedidu…). Amin. 

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Iha loron ida ne’e so'e tiha husi ita nia hanoin no nanál: hanoin sira no lia-fuan sira ne'ebé la di'ak.

LORON 7^O:

            Nai Maromak mak hau nia abrigu fatin wain-hira hau iha susar laran.

Harohan:

            Nai, Aman iha lalehan, Ita nunka rejeita sira ne'ebé buka Ita Bo'ot Nia tulun no prontu nafatin haksolok sira ne'ebé triste, laran susar. Liu husi Saun Fransisku Assis nia intersesaun no iha Jezus Kristu nia naran, hau husu Ita Bo'ot Nia mizerikorida ba hau nia nesesidadi hotu *(hatete sai ita bo'ot nia pedidu…).  Nai hasai hau husi susar tomak. Amin. 

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e: Tuir Jezus no Fransisku Assis nia izemplu, halo buat di'ak ruma ba sira ne'ebé karik la gosta ita.

LORON 8^O:

            Nai Maromak besik ba ema ne'ebé dezanima.

Harohan:

            Tanba Ita Bo'ot Nia virtude , oh Aman Lalehan, simu ho lalais ami nia susar sira. Iha hau nia susar laran ida ne’e, hau husu ba Ita Bo'ot atu rona no hatan hau nia orasaun sira *(hatete sai ita bo'ot nia pedidu…). Iha Ita Bo'ot de'it, oh Nai Maromak, mak hau fiar metin. Hau hasa'e no husu buat sira ne’e hotu iha Nai Jezus Kristu Nia naran no liu husi Saun Fransisku Assis nia intersesaun. Amin.

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e:  Tulun ema ida ne'ebé karik ita hatene presiza hela ita nia apoiu no atensaun nu'udar kolega ka família.

LORON 9^O:

            Nai Maromak sei liberta Ó no salva Ó tanba Nia hadomi Ó.

Harohan:

            Nai, Aman Laran-Diak, hau hakarak agradese ba Ita Bo'ot loro-loron tanba diak tomak ne'ebé Ita Bo'ot halo ba hau. Ho Ita Bo'ot Nia tulun hau sei hahí nafatin Ita Bo'ot Nia di'ak tomak iha hau nia susar laran. Agora tulun hau ba, tanba hau fiel la'o tuir Kristu Jezus, hau nia Salvador, no hau husu tulun ba hau nia belun Saun Fransisku Assis nia intersesaun atu simu hau nia harohan ida ne’e *(hatete sai ita bo'ot nia pedidu…). Amin.

*Ami Aman..1x. Ave Maria..3x. Gloria…1x

Peniténsia ne'ebé ita bo'ot tenki halo iha loron ne’e:  Nu'udar ita nia agradesimentu, hatudu ita nia hahalok di'ak ba ema seluk iha loron ida ne’e no mós ba matebian sira: husu misa ida.

***Jezus dehan: Hamrik, no la'o ba! Ó nia fiar mak salva Ó! Novena ne’e mós nu'udar respota ba Ó nia fiar. Ó fiar mak buat hotu sei akontese ba Ó.