SAUN FRANSISKU NIA HAKEREK BA FREI LEO
TEISTU
A - MAMOSEK BA MAROMAK LETEN ÁS (MML)
1Ita mak Santu, Nai mesak ida deit, nebé halo milagre oioin (Sal 76, 15).
2Ita mak Forte,
Ita mak Boot (Sal 85, 10)
Ita mak Ás Tebes,
Ita mak Liurai Kbiit Nain,
Ita mak Aman Santu, Liurai lalehan no rai!
3Ita mak Nai Nain Tolu no Ida deit,
Nai Maromak buat hotu nia maromak,
Ita mak diak, buat hotu nia diak, nebé diak wain-tebes,
Nai Maromak nebé moris no lós (kpr. 1Tes 1, 9)!
4Ita mak domin!
Ita mak Kdiak!
Ita mak hakraik-an!
Ita mak pasiénsia (Sal 70, 5)!
Ita mak furak!
Ita mak laran-kmaus
Ita mak mahein!
Ita mak hakmatek!
Ita mak laran metin no ami nia ksolok!
Ita mak lialós no temperansa!
Ita mak ami nia riku-soin tomak nebé wain tebes.
5Ita mak beleza!
Ita mak laran-kmaus!
Ita mak mahein (Sal 30, 5)!
Ita mak ami nia guarda no defensor!
Ita mak forte (Sal 42, 2)
Ita mak matak-malirin!
6Ita mak ami nia laran-metin!
Ita mak ami nia fiar!
Ita mak ami nia domin!
Ita mak ami nia midar tomak nia hun.
Ita mak ami nia moris rohan-laek nian,
Oh Nai nebé boot no boot tebetebes,
Oh Nai Maromak Kbiit Nain,
Salvanain nebé fuan nakonu ho domin!
B - BENSAUN BA FREI LEO (BL)
B - BENSAUN BA FREI LEO (BL)
1Nai haraik bensa ba Ó no guarda Ó;
Nia hatudu Nia oin ba Ó no hadomi Ó.
2Nia fila Nia oin ba Ó no haraik dame ba Ó.
3Nai haraik bensaun Ó, irmaun Leo (Kpr. Num. 6, 24-27).
KOMENTÁRIU BA TEISTUS (A-B)
Karta kiik ida ba Frei Leo ne’e nudar perkamen tahan ida nebé hakerek Mamosek ba Maromak iha Leten Ás (MM) iha pájina oin kedas. Iha nia pájina kotuk hakerek Bensaun ba Frei Leo (BL). Notas rua ne’e nudar autobiografia Fransisku ninian rasik. Tó ohin loron sei rai nudar relíkia iha Sacro Convento iha Assis. Fransisku ninia obra ne’e mos hetan atensaun barak hanesan ho Knananuk ba Maun Loron-Matan.
Perkamen ne’e nia medida maizumenus 10x14cm. Parte rohan leten no kraik aat ona. Teistu Mamosek ba Maromak iha Leten Ás iha pájina klaran mos labele lé ona; nia aat tanba nai-lulik nia liman sanak fatin (tanba kosar) nebé kaer relíkia ne’e hodi fó benze ba sarani. Seluk, perkamen ne’e mos Frei Leo lulun dala-rua tau iha ninia batina bolsu. Lulun ne’e istraga letra no hakerek barak labele lé tan. Tuir Fransisku hameno, Frei Leo tenki rai hakerek ne’e iha ninia batina bolsu laran tó nia mate. Maneira ne’e la dun diak, tanba halakon letra no liafuan barak. Iha Parte seluk, karik Frei Leo la rai iha ninia batina bolsu rasik, dala ruma dokumentu ne’e la tó mai ita.
Autentisidadi
Tómas husi Celano (2 Cel 49) fó testemuñu katak, bainhira Fransisku iha Foho La Verna, nia belun ida hakarak lós atu hetan eskrita nebé Fransisku rasik hakerek. Nia laran metin katak ho nune’e nia bele ses husi tentasaun klamar nian. Fransisku hatene nia hakarak ne’e. Tanba ne’e Fransisku hatete ba nia, “Lori surat tahan ida no tinta mai tanba hau hakarak hakerek Nai nia liafuan no mamosek ba Nia nebé hau reflete iha hau nia fuan laran.” Hafoin hetan tiha sa mak nia hakarak, nia hakerek ho nia liman rasik Mamosek ba Maromak no liafuan sira nebé Nia hakarak, no ikus mai bensaun ba frei ida, nia dehan “Simu surat tahan kiik nebá no rai ho diak ba, tó Ó nia loron mate.” Momentu ne’e kedas tentasaun ba frei ida ne’e mos lakon.
Prova importanti liu ba nia autentisidadi mak Frei Leo ninia nota sira rasik nebé nia hakerek “Bensaun” ho tinta mean iha sorin leten no sorin kraik. Iha nota ne’e dehan nune’e, “Fransisku, tinan rua antes nia mate, halao jejun loron hat-nolu iha Foho La Verna hodi fó onra ba Virjen Santa Maria Maromak Nia Inan no Saun Migel Anju Boot, hahú husi festa Virjen Santa Maria nebé Maromak hasai ba lalehan tó fali festa Saun Migel, iha fulan Setembru. Maromak nia liman hamahan nia. Hafoin anju seráfiku hatudu-an no ható tiha mensazen no prega tiha Kristu nia kanek (estígmata) ba nia isin, nia altera mamosek nebé hakerek iha surat tahan ne’e nia sorin rua. Ho nia liman nia hakerek, ho ibun nia hasae dau-daun agradese ba Maromak tanba grasa nebé Maromak haraik ba nia.” Iha teistu nia kraik, Frei Leo aumenta nota tuir mai ne’e, ho tinta mean mos, “Fransisku hakerek ho nia liman bensaun ne’e ba hau, Frei Leo.” Mos iha kraik “Tau ho ulun” nia sei aumenta tan liafuan sira ne’e: “Hanesan ne’e mos nia halo sinál tau ho ulun.” Notísia testemuñu-haré ho matan ne’e nia valor boot tebetebes.
Konaba tempu hakerek, nota mean Frei Leo iha leten fó indikasaun ho klaru tebes, katak: tinan rua antes nia mate, durante halao tempu jejun antes feste Saun Migel (29 Setembru), maibé hafoin nia simu estígmata. Nebé tempu hakerek entre 17 no 29 Setembru 1224.
MM nudar ladaña ida nebé temi-repete Nai Maromak nia hahalok oioin. Karik Fransisku senti esperiénsia ida nebé klean no nakonu konaba Maromak. Tanba ne’e husi laran nebé nakonu resin ne’e fakar-sai mamosek badak sira nebé dehan sai se mak Maromak nebé nia senti dau-daun ne’e. Haré momós karakterístika nebé baibain hetan iha Fransisku nia espresaun sira konaba Maromak. Iha parte ida, Maromak ne’e “forte, boot, iha Leten Ás, Makás tebetebes”, iha parte seluk, Nia ne’e “diak, buat tomak nia diak, diak liu hotu, domin nain, laran maus”; seluk husi ne’e, Nia ne’e “iha kraik liu” (humilitas). Maromak ida ne’e ninia karákter atrai tebes Fransisku nudar Maromak Leten Ás nebé hakraik-An no hamamuk-An ba ema. Maromak Nia hahalok sira ne’e senti tebes iha mamosek ne’e nia laran. Nia senti-hetan Maromak nia Minoridade (hakiik-An), ho konsekuénsia katak, nia la iha opsaun seluk, tenki halo Minoridade ne’e nudar nia programa moris.
Bensaun nebé nia hakerek ba Frei Leo nudar bensaun nebé hetan iha livru Númerus 6:24-26. Karik Fransisku la hatene katak bensaun ne’e mai-kedas husi bíblia, maibé nia hatene no nia foti liafuan sira ne’e husi livru sira liturjia nian. Livru pontifisiu iha Inosensiu III nia ukun hakerek mos bensaun ne’e. Bensaun ne’e uza ba fó rekonsiliasaun ba konverte nain sira iha loron Kinta-Feira antes Páskua.
Comments
Post a Comment