MAMOSEK NEBÉ REZA IHA SELEBRASAUN HOTU-HOTU (MRSH)

TEISTU

¹Santu, santu, santu ba Maromak Leten Ás,
  nebé oras  ne’e iha, no nebé iha tiha ona no nebé sei mai (Ap 4, 8):
  Mai ita hahí no hawelok Nia tinan ba tinan.

²Nai, ami nia Maromak, Ita soi duni simu hahí,
  Glória, no onra no bensaun (Ap 4, 11):
  Mai ita hahí no hawelok Nia tinan ba tinan.

³Maromak nia Bibi Oan nebé mate ona soi duni atu
  simu kbiit no maromak-ilas, kdiak no kbiit,
  onra no glória no bensaun (Ap 5, 12).
  Mai ita hahí no hawelok Nia tinan ba tinan.

⁴Mai ita hahí Aman, no Oan, no Espíritu Santu:
  Mai ita hahí no hawelok Nia tinan ba tinan.

⁵Hahí Nai, Maromak nia kriatura tomak (Dn 3, 37):
  Mai ita hahí no hawelok Nia tinan ba tinan.

⁶Hahí ita nia Maromak, Nai nia atan sira,
  No imi hotu, kiik ka boot, nebé hamtauk Maromak (Ap 19, 5):
  Mai ita hahí no hawelok Nia tinan ba tinan.

⁷Lalehan no rai hahí Nai nebé nakonu ho glória (Kpr Sal 68, 35):
  Mai ita hahí no hawelok Nia tinan ba tinan.

⁸Kriatura tomak nebé iha lalehan no nebé     iha rai
  no iha raik-okos no iha tasi no buat hotu nebé iha nia laran (Ap 5, 13).
  Mai ita hahí no hawelok Nia tinan ba tinan.

⁹Glória ba Aman, no Oan no Espíritu Santu:

Mai ita hahí no hawelok Nia tinan ba tinan.

¹⁰Nudar horik uluk, oras ne’e,

tinan ba tinan nafatin. Amen.

Mai ita hahí no hawelok Nia tinan ba tinan.

¹¹Ita harohan:

Maromak Kbiit Nain, Santu tebe-tebes,

no Maromak Soberanu,

Ita mak buat diak-wain tomak,

diak liu, no nia diak hotu-hotu;

Ita mesak deit mak diak;

ba Ita ami fó fila mamosek tomak,

glória tomak, grasa tomak,

onra tomak, bensaun tomak

no buat diak tomak,

ami ható ba Ita tinan ba tinan. Amen

KOMENTÁRIU BA TEISTU

   Autentisidadi

Kuaze manuskritu sira hotu fó testemuña katak, Fransisku mak kompoin mamosek ne’e, ka maizumenus nia hananu mamosek ne’e iha ninia orasaun véspera sira hotu. Tanba ne’e la iha  dúvida konaba nia autentisidadi. Maibé orasaun mamosek ne’e la dun orijinál, eseptu orasaun taka nian. Fransisku halibur deit testu bíbliku-litúrjiku sira nebé nia bele uza. No nia organiza tuir métódu ínu nebé reza iha liturjia misa antigu nian iha loron Sábadu sira kuatertemper  nian.

Tempu hakerek

Hanesan ho Saun Fransisku nia orasaun sira seluk, mamosek ne’e mos labele hametin nia tempu hakerek nian. Husi notas sira iha manuskritu bele dada konkluzaun katak, Fransisku kompila no uza orasaun ne’e loro-loron iha nia oras litúrjika sira hotu. Tanba ne’e nia tempu kompozisaun mos karik tenki hatur antes nia mate.

Valor espirituál

Husi notas sira iha manuskritu fó hatene katak, Fransisku reza duni orasaun Ami Aman nebé nia sempre aumenta ho liafuan Ida Nebé Santu Liu (Sanctissime) iha oin. Husi ida ne’e hatudu katak, Fransisku ho maneira ne’e nia foin deskobre, hetan no hatene tomak Maromak nudar aman. No nia konsiente lolós nafatin kdook entre Aman Maromak no ema nebé hatada-an ba Nia.

Mamosek ida ne’e mos revela Fransisku ninia espiritualidadi husi parte seluk ida. Ema koalia lós katak, ninia santidadi hatada ho makás lós ba Jezus ninia moris iha mundu, maibé ho maneira ida ne’e ema labele haluha atu hamatan ba buat seluk mos, katak: Fransisku mos hatada-an nafatin ba loron oin mai. Lós katak iha versíkulu sira ne’e duni mamosek ne’e, nebé barak liu hasai husi Livru Revelasaun (Apokalipse),
nia hatutan nia-an husi loron ba loron, iha kada oras nia orasaun nian, hamutuk ho sarani sira nebé iha ona lalehan, nebé hamrik iha Kadunan no iha Bibi Oan nia oin hasae sira ninia knananuk mamosek nian ba Maromak (kpr. Rev. 7:9-10). Teistu livru lulik nebé hadadak ho simples iha ne’e hatudu momós katak, hamutuk ho orasaun litúrjika loro-loron nian Fransisku hakarak halo hamutuk nia-an ho Igreja ninia harohan nebé kmós no Ás. Ne’e duni mamosek ne’e iha ninia signifikadu klean atu kumpriende ema santu ne’e nudar homo alterius saeculi,ema nebé hanesan fókit-an sai tiha ona husi mundu ne’e no hela tiha ona iha mundu sorin nebá. Estilu ordenamentu no maneira ninia buat-uza ne’e importanti tebetebes atu deskreve Fransisku ninia espirituál.