AGRADESE BA MAROMAK TANBA KBIIT OIOIN

- SAUDASAUN BA VIRTUDI HOTU (SV) -

      (Fó obrigadu ba Maromak tanba kbiit oioin)

TEISTU

¹Salve, oh Liurai-Feto Kdiak nian. Nai salva ita, hamutuk ho ita nia alin-feto, simplisidadi nebé kmók no santa!

²Oh Liurai-Feto Kiak nian nebé santa. Nai salva ita, hamutuk ho ita nia alin-feto, haraik-an nebé santa.

³Oh Liurai-Feto karidadi nian nebé santa. Nai salva ita, hamutuk ho ita nia alin-feto, obediénsia nebé santa!

⁴Virtudi hotu nebé santa liu. Nai salva imi hotu, husi Nia imi moris no imi mai!

⁵Laiha ema ida mos iha mundu, bele kaer buat sira ne’e ida husi imi, wainhira nia la mate uluk-lai.

⁶Se mak kaer ida, no la viola sira seluk, nia kaer sira hotu.

⁷Se mak viola buat sira ne’e ida, nia la kaer ida mos, no nia viola sira hotu (Tg 2, 10).

⁸Sira ida-ida harahun tiha buat aat no sala tomak:

⁹Kdiak nebé santu harahun tiha demóniu ho nia matenek-foer.

¹⁰Simplisidadi nebé kmók no santu harahun tiha buat kdiak hotu mundu ne’e nian (1 Kor 2, 6) no kdiak isin nian.

¹¹Kiak nebé santu harahun tiha kantén no karaktén no hanoin hotu mundu ne’e nian.

¹²Haraik-an nebé santu harahun tiha foti-an no ema ho buat hotu-hotu husi mundu ne’e.

¹³Karidadi nebé santu harahun tiha hotu demóniu no isin nia tentasaun, no tauk isin nian.

¹⁴Obediénsia nebé santu harahun tiha hakarak sira matan no isin nian.

¹⁵Nia nudar mahein atu hamate nafatin isin nia hakarak hodi hakruk-halo tuir ispíritu no obedese ba nia irmaun sira.

¹⁶Nia mak halo ema bele hakruk ba ema hotu iha mundu ne’e.

¹⁷No laos ba ema deit, mabe mos ba animal kmaus no balada fuik sira hotu.

¹⁸Atu nune’e sira bele halo saida deit ba sira nia-an, tuir saida mak husi leten, Nai, fó ba sira (kpr Ju 19, 11). 

KOMENTÁRIU BA TEISTU

Obra kiik ne’e baibain hatama iha grupu “ orasaun no knananuk hahi nian”, no hatur kedas iha fatin hafoin Saudasaun ba Virjen Santa Maria (SVSM). Maibé la hanesan baibain atu konsidera saudasaun ne’e nudar orasaun, tanba nia koalia ho belun ida nebé laos Maromak ka Virjen Santa Maria (hanesan iha SVSM). Maibé nia koalia ba virtude sira hotu nebé nia personifika, trata nudar ema. Tanba ne’e karik diak liu obra ne’e haré nudar skema omília ida (J. CAMBELL), ka konvite nebé ható ho forma múzika/poezia. Maneira ida ne’e hanesan ho Fransisku ninia konvite ba frei sira iha R2. 9: 3-4, atu sira “haklaken ba sarani sira  (ho momós) konaba buat nebé aat-foer no virtudes, kastigu no glória, ho omília nebé badak” ba sarani sira nia formasaun. Tanba ne’e karik diak liu obra kiik ne’e hatama iha grupu “ regra moris nian” no hatama depois admonisaun sira. 

Autentisidadi

Testemuña nebé folin boot tebetebes konaba autentisidadi mak ida nebé Tómas Celano fó (2Cel 189). Nia hatudu katak iha “knananuk hahi oioin” (Lauda)  nian konaba virtudes barak no sita husi versikúlu da’uluk: “Salve, Liurai Feto Matenek nian; laran metin katak Maromak sei proteje Ó, hamutuk ho Ó nia irman, simplisidade nebé santu-kmós”. Teistu sira nebé hakerek Fransisku nia obra sira, la iha esepsaun, hatama mos iha grupu nia obra.

Obra ne’e nia konteúdu rasik mos afirma nia autentisidadi ne’e. Nia hanaran virtudi hotu nudar “feton/irman” ka “liurai feto”; ida ne’e mak Fransisku ninia karakterístika. Uza mos terminolojia “mundu, isin, na’an no espíritu” ho signifikadu nebé nakonu lós, dala barak hetan iha ninia obra sira. Klean liu tan ida ne’e, SV hatudu nia maneira hanoin nebé bíbliku.

Tempu hakerek

La hatene lolós hori bainhira obra kiik ida ne’e (hahú) hakerek. Se karik SV ne’e nudar parte ida deit ho SVSM hanesan espesialista balu nia hanoin, maibé la iha  indikasaun nebé ajuda hodi siik tempu hakerek obra ne’e, tanba ema ida mos la hatene SVSM ninia tempu hahú hakerek. 

Valor

Virtudi nebé okupa fatin barak liu mak obediénsia. Versíkulu 14-18 ható konsekuénsia sira hotu konaba obediénsia ne’e ho naruk lós, liu fali sa mak hatete konaba virtudi sira seluk. Uluk liu, karik Fransisku la hanoin hari metin disiplina moris fraternidadi nian ho subliña liu obediénsia. Saida mak forte iha buat nebé nia subliña mak signifikadu obediénsia relijioza ne’e rasik, nudar dalan hodi sai kiik no hakrúk ba ema hotu, ba kriatura sira seluk, no sai ema nebé dependenti ho fó-an tomak ba Maromak, nune nia prontu hodi tahan hahalok saida deit, sarak buat ne’e lao hanesan ho Maromak nia hakarak (cfr vr. 18). Bele haré nudar imajen ema minor/kiik ida nebé simples-mós iha Maromak futar oin, nudar obediénsia nia fuan. 

    





Buat importanti seluk nebé presiza hakerek ne’e mak relasaun nebé metin entre virtudi ida ho ida seluk. Sira ida labele hamrik mesak ses husi ida seluk. Tanba ne’e karik hakás-an ba halo tuir ida, maibé kontra ida seluk, hanesan deit kontra sira hotu. Fransisku nia vizaun nebé formula iha versíkulu 6-7 ne’e hamrik iha tradisaun teolójika iha nia tempu. Santu Ambroziu hatete ona katak virtudi ida kesi-an ho ida seluk hanesan korenti matan, nune’e “se mak iha ida, nia iha barak”. Nune’e mos Saun Jerónimo no Bernardo halo formulasaun nebé hanesan. Fransisku hanesan eskritor sira seluk, foti liafuan xave nebé hanesan hodi dezenvolve nia liafuan nebé nia temi konaba virtudi.